Чулуун ГАНХУЯГГүйцэтгэх захирал

Чулууны Ганхуяг нь Ард Санхүүгийн Нэгдэл ХК – ийн үүсгэн байгуулагчдын нэг төдийгүй, тус компанийн Гүйцэтгэх захирлаар ажиллаж байна. Монголын Хөрөнгийн Биржээс 1991 онд хөдөлмөрийн гараагаа эхэлсэн тэрбээр 1997 онд Унгар Улсын Будапешт хотын Корвинус Эдийн Засгийн Их Сургуулийг дүүргэж, Монголбанкинд хянан шалгагчаар оржээ.

1998 онд НҮБ-ын бичил санхүүгийн Микростарт төсөл дээр Санхүүгийн менежерээр шалгаран ажиллаж байгаад 1999 онд Монголын анхны банк бус санхүүгийн байгууллага болох Хөгжлийн Алтан Сан (ХАС)-г байгуулан Гүйцэтгэх захирлаар нь томилогдсон юм. ХАС нь бичил зээлийн үйл ажиллагааг амжилттай явуулсаар 2001 онд Говийн Эхлэл ББСБ-тай нэгдэж, өнөөгийн ХасБанк байгуулагдсан юм.

Ганхуяг нь ХасБанкийг байгуулагдсан цагаас хойш 2009 оныг хүртэл Гүйцэтгэх захирлаар ажилласан бөгөөд 2009-2010 онд ХасБанкны толгой компани болох ТэнГэр Санхүүгийн Нэгдэлийн Гүйцэтгэх захирлын албан тушаал, 2010-2012 онд Монгол Улсын Сангийн Дэд сайдын албанд томилогдон тус тус ажиллаж байв.

Тэрээр Унгар улсын өргөмжит консул, Монголын Эдийн Засгийн Форумын санаачлагч, Ерөнхий нарийн бичгийн дарга, Монголын Оюутны Холбооны Ерөнхийлөгч, Олон Улсын Бичил Санхүүгийн Төвийн УЗ-ийн гишүүн, Монголын Сагсан Бөмбөгийн Холбооны Ерөнхийлөгч гэх мэт албан тушаал хашиж байснаас гадна Монгол Улсад анхлан хадгаламж зээлийн хоршооны хөдөлгөөнийг 1990-ээд оны сүүлээр эхлүүлж, СИДАН ХЗХ-ны Удирдах Зөвлөлийн даргаар ажиллаж байжээ. 2009 онд Дэлхийн Эдийн Засгийн Форумаас түүнийг Дэлхийн Залуу Манлайлагчаар өргөмжилсөн байна.

Батбилэг ЗОЛБООСанхүү эрхэлсэн захирал

Золбоо нь Ард Санхүүгийн Нэгдэл ХК-ийн Санхүү эрхэлсэн захирал мөн Ард Менежмент ХХК-ийн Үйл Ажиллагаа Хариуцсан Захирлын албыг хашдаг. Мөн анхны криптовалютын арилжааны компани болох Ард Бит ХХК-г санаачилж хөгжүүлэх ажлыг удирдаж байгаа.

Тэрээр Платсбург хотын Нью-Йорк Мужийн их сургуульд санхүү эдийн засаг суралцан шинжлэх ухааны бакалаврын зэргийг Сумма Кум Лаудэ хүндэт өргөмжлөлтэйгөөр дүүргэж, ажил мэргэжлийн гараагаа Ард Секюритиз ҮЦК-нд санхүүгийн шинжээчээр эхэлсэн болно. Суралцаж байх үедээ, Золбоо нь J.P. Morgan-ий харъя компани болох Primary Insight, FINRA итгэмжлэгдсэн брокерын Darwood Associates зэрэг компаниудад дадлагажуулах хөтөлбөрүүд, туршлага судлах болон ажилд бэлтгэх сургалтуудад хамрагдсан. Тэрээр сургуулийнхаа “Оюутнуудын Хөрөнгө Оруулалтын Сан”-ийн Дэд-Ерөнхийлөгч болон Санхүү эдийн засгийн факультетын төлөөлөгчөөр ажилласан. Мөн Золбоо нь Сангийн Яамны Санхүүгийн Бодлогын газрын Санхүүгийн Зах Зээл, Даатгалын хэлтэст “Олон улсын хөгжлийн OPEC сангийн хөрөнгө оруулалтын идэвхжүүлэлт, хамгаалалтын гэрээ”, “Азийн дэд бүтцийн хөрөнгө оруулалтын банкны байгаль орчны болон нийгмийн тогтолцоо” гэх мэт хөрөнгө оруулалттай холбоотой баримт бичгийг боловсруулахад оролцсон.

Жаргалан АЛТАНГҮНИЙҮйл ажиллагаа хариуцсан захирал

Жаргалангийн Алтангүний нь Ард Санхүүгийн Нэгдлийн үйл ажиллагаа эрхэлсэн захирлаар ажиллаж байна. Тэрээр ажлын гараагаа Х.А.С (Хөгжлийн Алтан Сан) ТББ-ийн зохицуулагчаар эхэлж байсан. Түүний урьд нь гүйцэтгэж байсан бусад ажлуудаас дурьдахад АйКонсепт ХХК болон Монголын эдийн засгийн форум ТББ-ын удирдагын багт орон ажиллаж байсан.

Монголын Олон Улсын их сургуулийн Олон улсын менежментээр бакалаврын зэрэг, Тайваны Үндэсний Шинжлэх Ухааны их сургуулиас Бизнесийн удирдлагын  магистрын зэрэг тус, тус эзэмшсэн.

Тэрээр ажил мэргэжлийнхээ хажуугаар нийгэмд хандсан үйл ажиллагаанд идэвхитэй оролцдог. 2006 оноос хойш олон улсын Ротари хөдөлгөөний Ротаракт клубын гишүүн бөгөөд 2010-2011 онд МУИС-ын Ротаракт клубын ерөнхийлөгчөөр ажиллаж байсан.  Түүнчлэн Дэлхийн Эдийн Засгийн Форумын дэргэдэх Глобал Шэйпэрс нийгэмлэгийн гишүүн, Улаанбаатар Глобал Шэйпэрс нийгэмлэгийн удирдах зөвлөлийн гишүүн юм.

Баяраа АРИУНААМаркетинг хариуцсан захирал

Баяраагийн Ариунаа нь Ард Санхүүгийн Нэгдлийн Маркетинг хариуцсан захирлаар ажиллаж байна. Тэрбээр 2015 онд Форбес Монголиа сэтгүүлийн “30-аас доош насны 30” шилдэг залуусын жагсаалтанд орж байв. Ариунаа нь маркетингийн чиглэл, гүйцэтгэх удирдлагын түвшинд 10 гаруй жил ажилласан туршлагатай ба түүний удирдаж зах зээлд нэврүүлсэн төслүүдэд The Blue Sky Hotel & Tower цогцолбор, АНУ-д үйл ажиллагаа явуулдаг Etugen Cashmere онлайн брэнд зэрэг багтдаг. 

Ариунаа нь Болгар дахь Америкийн их сургуулийг бизнесийн удирдлагын бакалавр зэрэгтэйгээр,  АНУ дахь UCLA Anderson School of Management сургуулийг бизнесийн удирдлагын мастер зэрэгтэйгээр тус тус төгссөн ба дижитал маркетинг чиглэлээр мэргэшсэн.

Гарьд ТЭНҮҮНДижитал Технологийн Захирал

Г.Тэнүүн нь мэдээлэл технологи, банк санхүү, төслийн менежментийн чиглэлээр арвин туршлага хуримтлуулж, 10 гаруй жилийн турш Монголын томоохон банкинд бизнес болон технологийн шинэчлэлийг хариуцан ажилласан юм.

Гарьдын Тэнүүн нь 2017 оноос эхлэн Ард Санхүүгийн Нэгдлийн Дижитал Технологийн захирлын албан тушаалыг хашиж байна.

Энхсайхан АМАРБАЯСГАЛАНХөрөнгө оруулалт хариуцсан захирал

Амарбаясгалан нь санхүүгийн салбар, хөрөнгийн зах зээлд 16 жилийн туршлагатай нэгэн бөгөөд Голомт Капитал ХХК-д Гүйцэтгэх захирал, Голомт Банкинд Хөрөнгө оруулалтын алба хариуцсан дэд захирлаар ажиллаж байсан юм. Үүнээс өмнө тэрээр Ньюком Майнинг Сервис ХХК уул уурхайн тоног төхөөрөмжийн түрээс, борлуулалт, үйлчилгээний компанид Санхүү хариуцсан захирал болон Гүйцэтгэх захирлын албан тушаал хашиж байсан.

Голомт Капитал ХХК-ийн Гүйцэтгэх захирлаар 2014-2018 онуудад ажиллахдаа тэрээр компанийнхаа ашгийн хэмжээг 3.5 дахин өсгөж, зах зээл дэх нэр хүндийг нь бэхжүүлж, Номура Судалгааны Институцтэй хамтран Монголын Хөрөнгийн Бирж дээрх хамгийн анхны цахим арилжааны платформыг нэвтрүүлж, хэд хэдэн компанийн бондыг гаргахад андеррайтерийн үйлчилгээ үзүүлсэн ба МХБ дээрх хамгийн том бонд болох Сүү ХК-ийн бондыг амжилттай гаргажээ. Ньюком Майнинг Сервис ХХК-д Санхүү хариуцсан захирал болон Гүйцэтгэх захирлаар ажиллаж байх хугацаандаа Амарбаясгалан нь банкны гэрээ гүйцэлдүүлэх, өрийн бүтцийг өөрчлөх ажлыг хариуцаж байсан ба 4.3 сая долларын зээлийг дахин санхүүжүүлж, Өмнөговь аймагт 5 сая долларын бүтээн байгуулалтын ажлыг дуусгаж, тендерийн үнэлгээ, гэрээ тохиролцооны ажлыг удирдаж байжээ. Ньюком Майнинг Сервис ХХК-д орохоосоо өмнө Амарбаясгалан нь АНУ-д PWSP ХХК болон Виза ХК-д алба хашиж байсан юм.

Амарбаясгалан нь Жоржиа их сургуульд Санхүүгийн чиглэлээр Бизнесийн Удирдлагын бакалаврын зэрэг, мөн Индиана их сургуульд Санхүү ба Шийдвэр гаргалтын шинжлэх ухааны чиглэлээр Бизнесийн удирдлагын мастер цол хамгаалсан. Түүнчлэн, Амарбаясгалан нь 2017 онд МХБ-ээс Хөрөнгийн зах зээлийн тэргүүний ажилтан цол тэмдгээр шагнуулж, “Forbes Mongolia” сэтгүүлийн “40-өөс доош насны 40 манлайлагчаар” нэрлэгдэж байжээ. Мөн 2015 онд Монголын Залуучуудын Холбооноос “Залуу манлайлагч” цол тэмдэг хүртсэн. Тэрбээр Бэнжамин Грахамын “Ухаалаг хөрөнгө оруулагч” номыг Монгол хэл рүү орчуулан хөрвүүлж гаргасан бөгөөд тус ном нь орон даяар бэстсэллэр болоод байна.

Мөнхбат МӨНХ-ЭРДЭНЭДотоод аудитор

Аръясүрэн БАТБОЛДКорпоратив нарийн бичгийн дарга

Сүхбаатар АНАР-ЭРДЭНЭХууль эрх зүй, хянан нийцүүлэлт эрхэлсэн захирал

АНАР-ЭРДЭНЭ нь БНХАУ-ын Бээжингийн Их Сургуулийн Хууль Зүйн Сургуулийг эрх зүйч мэргэжлээр төгссөн, эдүгээ Монгол Улсын Их Сургуулийн Хууль зүйн сургуульд судалгааны магистр хамгаалахаар суралцаж байгаа. Суралцах хугацаандаа Дэнтонс хуулийн фирмийн Бээжин дэх төв оффис, АНУ-ын Шерман • Стерлинг хуулийн фирмийн Бээжин дэх  салбар, Улсын Дээд Шүүхийн судалгааны төв, Монгол Улсын Үндсэн Хуулийн Цэцэд тус тус дадлагажин ажиллаж байсан. Дэнтонс хуулийн фирмийн Монгол дахь салбарт туслах хуульчаар ажиллаж байх хугацаандаа хөрөнгө оруулалт, уул уурхай, концесс, компанийн эрх зүйн чиглэлээр мэргэшин ажилласан юм.

Анар-Эрдэнэ нь  Дэнтонсын бусад орнуудын салбараар дамжин ирдэг Америк, Европын нэр хүндтэй том компаниуд /EBRD, MSTS(АНУ), Herbalife, MIR(Орос), John Deere etc./, Азиас ихэвчлэн БНХАУ-ын томоохон төрийн өмчит болон хувийн компани /China Railway Construction Corporation etc./, мөн Монголын том уул уурхайн компаниудад хууль зүйн төрөл бүрийн зөвлөх үйлчилгээ үзүүлэн ажилласан юм.

Ажлын хажуугаар Монголын хуульчдийн нийгэмлэгийн гишүүн байхдаа хуульч, хуулийн мэргэжилтнүүдэд эрх зүйн чиглэлийн болон хууль зүйн англи хэл зэрэг сургалтууд зохион байгуулдаг байсан. Мөн одоо Язгуур Ашиг ТББ-ын Гүйцэтгэх захирал хийдэг ба ихэвчлэн хувь хүний мэдлэг чадварыг дээшлүүлэхэд чиглэсэн уулзалт лекцүүд зохион байгуулдаг. Сурч, ажиллаж байх хугацаандаа Англи, Хятад хэлийг өндөр түвшин/хууль зүйн/-д эзэмшсэн.

Хангай ХУЛАНТУЗ-ийн нарийн бичгийн дарга