by

Авир СҮХДОРЖ 2014-08-25

ГрэйпСити Монгол ХХК-ний ерөнхий захирал, "Мост Финтек" ХХК-ний гүйцэтгэх захирал А.Сүхдорж нь 1975 оноос Монгол Улсын Төлөвлөгөөний комисст ажлын гараагаа эхэлж төд удалгүй Монгол улсын төв банкны Тооцоолон Бодох төвийн даргаар томилогдон тус газрыг амжилттай удирдаж байжээ. Тэрээр Украйн улсын Киев хотын Политехникийн их сургуулийг Компьютерийн инженер мэргэжлээр төгссөн.

Социалист тогтолцооноос зах зээлийн эдийн засагт шилжсэний дараахан 1991 онд Монгол улсын анхны мэдээллийн технологийн компани болох БСБ Сервис ХХК-г (одоо БСБ групп) үүсгэн байгуулсан байна. БСБ Сервис ХХК-гий ТУЗ-ийн дарга, ерөнхий захирлаар ажиллаж байх хугацаандаа 2000 онд банк санхүү төлбөрийн шийдлийн програм хангамжийн компани болох ГрэйпСити Монгол ХХК-г үүсгэн байгуулж, 2001 онд сансрын холбооны үйлчилгээ үзүүлэгч Инкомнет ХХК-г байгуулсан юм. ГрэйпСити Монгол ХХК нь эдүгээ Монгол улсын банк санхүү төлбөрийн шийдлийн програм хангамжийн тэргүүлэгч болжээ.

Тэрээр Монголын Мэдээлэл Харилцаа Холбооны хөгжлийн түүчээлэгч бөгөөд банк санхүү, төлбөрийн секторын хөдөлгөгч хүч болсоор ирсэн билээ. Өнгөрсөн 40 жилийн хугацаанд олон тооны амжилттай төслүүд хэрэгжүүлсэн бөгөөд 2008 онд улсын хэмжээний анхны төлбөрийн үйлчилгээний оператор компанийг байгуулж (Мост Финтек ХХК), 2012 онд цахим төлбөр тооцооны МостМони мобайл хэтэвч үйлчилгээг зах зээлд амжилттай нэвтрүүлсэн юм.