ТОРОНТОГИЙН ХӨРӨНГИЙН БИРЖ “SOUTHGOBI RESOURCES”-ИЙН ХЯНАЛТЫН ХУГАЦААГ ДАХИН СУНГАВ 2015-11-05

2015-11-2 Торонтогийн Хөрөнгийн бирж Овоот Толгой ордод олборлолт явуулдаг “SouthGobi Resources” компанийн хяналтын хугацааг энэ сарын 23 хүртэл дахин сунгалаа. Түүнчлэн тус компани Азид төвтэй хөрөнгө оруулалтын сантай 10 сая долларын богино хугацааны зээлийн гэрээ байгуулсан байна. Гэрээний дагуу эхний 6.3 сая долларыг өнгөрсөн баасан гарагт татсан бол үлдсэн хөрөнгийг энэ сарын дундуур авах хүлээлттэй байгаа юм байна. Үүнээс гадна “Turquoise Hill Resources” компанитай 3.8 сая долларын төлбөрийг барагдуулах хугацааг ирэх он хүртэл хойшлуулах гэрээ байгуулжээ. “Turquoise Hill Resources”-ийн зүгээс “Оюу Толгой” төсөлд төвлөрөх үүднээс “SouthGobi Resources” дахь эзэмшлийн хувиа бууруулж байгаа аж. Харин “SouthGobi Resources” компани өмнөө тулгараад байгаа санхүүгийн бэрхшээлээ шийдэхээр гол хувьцааг эзэмшигч “Novel Sunrise Investments” компанитай хамтран ажиллаж байна. Хэрэв санхүүгийн бэрхшээлээ шийдэж чадахгүйд хүрвэл Торонтогийн Хөрөнгийн бирж биржээсээ хасах арга хэмжээ авч магадгүй байгаа юм. Тус компанийн зүгээс өнгөрсөн улирлын санхүүгийн тайлангаа энэ сарын 12-нд танилцуулна. www.bloombergtv.mn